21/06/21

3º_Visita Sr. Alcalde Walter Pardo

 

Hoxe, penúltimo día lectivo do curso 2020/21, recibimos a visita do Sr. Alcalde Walter Pardo para ler e facerlle entrega da nosa instancia (expoñemos-solicitamos) que redactamos como actividade final do lapbook de Ciencias deste último trimestre.

Agradecemos ao Sr. Alcalde que fixera un oco na súa axenda para recoller persoalmente a nosa instancia e escoitarnos; aínda que xa nos aclarou que algúns dos obxectivos que recollemos como Axenda 2022 do Concello de Malpica de Bergantiños xa están en proceso, algúns mesmo cumpridos. Esperamos que todos eles se acaden antes de que finalice o ano 2022.

O vindeiro curso seguiremos aprendendo, contribuíndo á construción dun mundo mellor xunt@s!

05/06/21

Laboratorio de Ideas: construíndo un mundo mellor!

O Laboratorio de Ideas Construíndo un mundo mellor! pecha a implementación dos laboratorios de aprendizaxe 2020/21 e do PDI, bianual, Visión 3C: Comunicación, Ciencia e Creatividade.

Os produtos do laboratorio, Axenda 2030 e Medio Ambiente, conforman a exposición final; unha exposición coa que tamén conmemoramos o Día do Medio Ambiente a través de maquetas/construcións ecolóxicas, creativas e únicas que reflicten o mundo de aprendizaxes desenvoltas ao longo do curso, aprendizaxes de vida.

Parabéns, unha vez máis, a tod@s pola vosa creatividade, pola vosa sensibilidade coa diversidade de mundos, persoais e sociais, cos que coexistimos.

Premendo na imaxe accederedes ao álbum de fotos da exposición.

O vindeiro curso navegaremos nun novo mar de aprendizaxes compartidas, sempre coa visión nítida de tod@s de que a construción dun mundo mellor é posible se cada un/unha de nós aporta o seu gran de area na singradura da vida.


3º_Lab. de Ideas: construíndo un mundo mellor!

Presentamos o vídeo-resumo do Laboratorio de Ideas que complementa o Laboratorio de Son: o mundo escríbese...con X!

Atendendo ao noso PDI Visión 3C en relación coa Axenda 2030 e o Día do Medio Ambiente, que se celebra no día de hoxe, construímos por equipos 4 maquetas/construcións ecolóxicas e creativas.

Pechamos un curso de experiencias compartidas arredor, entre outros, dos laboratorios de aprendizaxe.

O vindeiro curso seguiremos divertíndonos aprendendo!

04/06/21

Xeografía lectocreativa Milladoiro: Leohle

Pechamos o curso 2020/21, adaptando o lema proposto dende a Asesoría de BE ao noso proxecto de colexio, coa inauguración do mural...

Xeografía lectocreativa Milladoiro: Leohle

que recolle os espazos e recursos que usamos ao longo do curso e que nos acompañará, ano tras ano, para seguir consolidando o concepto BE-LeoLab: a Biblioteca entendida como centro de recursos e espazos creativos ao servizo da aprendizaxe e para tod@s.

Reflectimos a xeografía da nosa BE-LeoLab a través dunha árbore pola súa representación do natural, polo seu significado ancestral en diversas culturas: árbore do coñecemento, árbore da sabiduría, árbore da familia, árbore da vida, árbore de creación e protección...e porque todas as pólas medran en diferentes direccións, mais todas se alimentan e medran grazas á mesma raíz: a Biblioteca Escolar.

Para elaborar o tronco e as follas de cada copa reutilizamos os libros expurgados, as imaxes de cada espazo creativo son as que compoñen a nosa Formación de Usuari@s en liña e coa colaboración da comunidade: forrando a parede, picando as follas, conformando a pila de libros-tronco, rotulando os carteis ou realizando a montaxe da árbore; obtemos o fantástico resultado que podedes ver na imaxe.

Picando na imaxe accederedes ao álbum de fotos do mural.

Un ilustrativo e creativo mural construído por e para tod@s!

17/05/21

Letras Galegas e Lab. de Son

Presentamos en formato audiovisual os produtos finais do Laboratorio de Son adicado a Xela Arias en relación cos ODS da Axenda 2030: o mundo escríbese...con X!

Ante a imposibilidade de poder celebrar na nosa Biblioteca, coma cada curso escolar, o Festival das Letras este vídeo fainos sentir xunt@s reflectindo as experiencias poéticas e constructivas que se fraguan en cada grupo-clase na procura dun mundo mellor e se crearon implementando o penúltimo laboratorio de aprendizaxe do curso.

Non puidemos ter mellor mentora, no noso Mes das Letras, que Xela Arias: aquela nena de Sarria, aquela muller libre, inconformista, comprometida, rebelde vital e literaria.

Parabéns a tod@s, un laboratorio emocionante, creativo e moi, moi constructivo!

Seguimos...co último laboratorio do curso, o Laboratorio de Ideas: construíndo un mundo mellor!

3º_Mes das Letras e Lab. de Son

Presentamos o vídeo-resumo do proceso de desenvolvemento do Laboratorio de Son no que conmemoramos as Letras Galegas 2021 adicadas a Xela Arias en relación cos ODS da Axenda 2030.

Un laboratorio emocionante e moi productivo grazas ao traballo en gran grupo, por equipos no que integramos, ao longo do noso Mes das Letras, os ámbitos lingüístico e científico a través de diversas tarefas, así: 

  • Achegámonos á autora homenaxeada a través de diferentes exemplares da nosa Biblioteca, portofolio individual, recursos en liña e recursos audiovisuais.
  • Plantamos...ideas naturais! no Laboratorio de Ciencias, partindo do conto de Xela Arias A fraga dos paxaros faladores e a fraga leopardicia, reciclando ovos de parrula coma testo, serraduras das árbores da fraga coma substrato e comida de paxaros, alpiste, coma semente. Dándolle vida ao testo obtemos unha cabeza da que medran ideas moi, moi naturais!
  • Ideamos a nosa produción propia escrita Construíndo un mundo mellor! con versos de Xela Arias e versos da nosa creación en relación con algúns dos ODS da Axenda 2030 que tratamos ao longo do curso.
  • Confeccionamos a manualidade Día da Familia 2021, destacando a nosa produción propia e versos de Xela Arias.
  • Reciclamos coas caixas Xunt@s 3.21 construirtiX contando así con materiais de refugallo para a creación no Lab. de Ideas que formará parte da exposición final do PDI Visión 3C.
  • Elaboramos, MateCreando, a última exposición de aula Letras Galegas 2021. Lab. de Son e Lab. de Ideas.
  • Gravamos o programa Festexamos: o mundo escríbese con X , que podedes escoitar a continuación.

Feliz Día das Letras Galegas e...

a seguir construíndo un mundo mellor!

07/05/21

PROXECTO O BOSQUE: UN ESQUÍO EN APUROS ( 4º EI)



Tras recibir a solicitude de axuda do esquío, realizamos unha asemblea na que decidimos que fariamos para axudar a salvar os bosques, e así construir un mundo mellor:

 - Escribir ós que talan árbores para que soamente corten as árbores necesarias. 


 - Reciclar papel, xa que o papel ven das árbores 


 - Plantar: cousa que xa fixemos 

 - Comprometernos a tirar o lixo no contedor axeitado










29/04/21

CREAcción Día do Libro 2021

Presentamos o vídeo-resumo do Día do Libro 2021, que remitimos á Asesoría de Bibliotecas Escolares para participar na acción creativa que promoven baixo o título CREAcción Día do Libro 2021.

Parabéns a tod@s polo fantástico desenvolvemento do Laboratorio de Imaxe do que se obtiveron os carteis Leo le, nós lemos...? con información literaria, visual e virtual, que publicitamos por Malpica e outros concellos.

A seguir facendo amig@s...con cada libro!

26/04/21

1º de EP - Día do Libro: Leo le, nós lemos...?

Boas a todos e a todas!

Para conmemorar o Día do Libro (23 de abril) desenvolvemos unha actividade que está enmarcada dentro do Laboratorio de Imaxe. 

Para isto, gravamos un Booktuber individual no que cada neno e nena da aula fixo unha recomendación dun libro. Estes vídeos podedes atopalos no Blogue Booktubers Leohle

Ademais, empregamos os recursos do Leolab de maneira creativa coa intención de crear un cartel, sobre un dos contos escollidos, que fomente a lectura, a expresión oral e o intercambio de información. Este cartel conta cunha fotografía da representación da portada do libro escollido e un código QR para acceder ao vídeo correspondente (poderédelo ver colgado en diversos establecementos de Malpica).

Do mesmo xeito, cada membro do alumnado conta co seu propio código QR, plasmado nun mural, que nos leva a cada un dos seus vídeos.

Aquí vos quedan unhas imaxes do proceso!

  

 



  


Laboratorio de Imaxe - Día do Libro (3 anos)

Neste mes de abril , o Equipo de imaxe, tendo en conta que o día 23 de abril é o Día do Libro, propuxo realizar un cartel para xogar a adiviñar un conto a través de imaxes realizadas cos distintos recursos maker dos que dispoñemos no cole. No cartel temos que adiviñar de que conto se trata pero para comprobar se acertamos ou non, hai que escanear un código Qr ( creado polo alumnado) que nos leva ó booktuber que fala do mesmo.


Na nosa aula escollemos o conto dos 3 porquiños, polo que recreamos no Chroma as tres casiñas dos porquiños con recursos do Leolab: a casita de palla realizámola coas palliñas de contrución, a casa de madeira co Kapla e a casita de ladrillos con bloques de cartón duro que xa parecen ladrillos. Podedes ver todas as fotos da elaboración no seguinte enlace: tres porquiños.



Xa que non están preparados para elaborar eles un código Qr que enlace ó seu propio vídeo de booktubers, no cartel vai un código que enlaza a un vídeo de booktubers conxunto, xa que en infantil únicamente traballamos cun conto.





O pasado venres, 23 de abril, conmemoramos o Día do Libro facendo unha pegada de carteis polas rúas de Malpica e tamén contamos coa colaboración das familias para a distribución dos carteis. Podedes ver a fotos desta xornada no seguinte enlace: carteis. 






23/04/21

3º_Día do Libro 2021-Lab. de Imaxe

Presentamos o vídeo-resumo do Laboratorio de Imaxe que desenvolvemos ao longo do mes de abril para celebrar o Día do Libro 2021.

Despois de repasar a Guía de Usuari@s da nosa Biblioteca para realizar os empréstitos á aula e á domicilio preparamos e gravamos os booktubers que publicamos no blog Leohle.

O traballo por equipos permitiunos elaborar catro carteis que se corresponden con catro títulos diferentes e reflicten a imaxe da creación realizada no LeoLab e a edición do código QR que enlaza ao booktuber do libro.

No día de hoxe, venres 23 de abril, fomentamos lectura por Malpica coa pegada dun cartel, elexido por maioría, e os demais carteis creados forman xa parte da nosa exposición de aula.

Un laboratorio lector e creativo co que desfrutamos construíndo experiencias, fomentando lectura na nosa comunidade!

Feliz Día do Libro!


Hoxe celebramos o Día do Libro fomentando lectura por Malpica cos produtos finais do Laboratorio de Imaxe implementado ao longo do mes de abril.

Libros e códigos QR enlazáronse nos carteis literarios tan creativos elaborados por cada grupo-clase e que xa forman parte da exposición Construíndo un mundo mellor! deste último trimestre.

Parabéns a tod@s polos fantásticos produtos finais e...

Feliz Día do Libro!

15/04/21

Obradoiro de Barro - Creatividade

Comezamos este terceiro trimestre dedicado a CREATIVIDADE e co lema presente de "Construír un mundo mellor"contamos coa participación o pasado mércores nun obradoiro de barro impartido por Lidia de  CERAMICA CREARE de nosa localidade. 

Participou o ciclo de Educación Infantil e o primeiro ciclo de Educación Primaria e crearon unha maceta para continuar co traballo de plantación que se está levando a cabo en cada unha das aulas.

Podedes ver todas as fotos recollidas nos diferentes blogues:

Educación Infantil

1º Educación Primaria

2º Educación Primaria




10/04/21

PROXECTO O BOSQUE: PLANTAMOS (4ºEI)

 No escape room realizado antes de marchar de vacacións, a Serea Leo deixounos  de agasallo unhas sementes de flores para plantar. 

Así que á volta se Semana Santa comezamos a pescudar sobre o que precisamos para plantar, pero non houbo demasiada investigación, pois a maioría sabía que precisamos sol, auga, regadeira, terra, macetas, pala... e por suposto SEMENTES.

Para realizar esta actividade dividimos a clase en dous grupos para ir á aula de pequeciencias, onde cada neno e nena escolleu que tipo de flor prefería plantar, colocou un algodón, a semente e regou ( desta forma podemos ver como xermina). Nesta aula hai moita luz e calor, polo que, cando comece a brotar a semente  a pasaremos a unha maceta. Xerminarán as sementes de flores en algodón? Estaremos moi atentos.






FOTOS


Tamén lemos o conto El huerto de Simón, así que pareceunos moi boa idea, ademais de sementar flores, plantar alguns froitos e verduras, polo que teremos primeiro que saber que diferencia hai entre ambos. Para iso aprenderemos a seguinte canción:


05/04/21

Construíndo un mundo mellor!

Iniciamos o último trimestre do curso con novas actividades!
Presentamos o caderno de propostas para integrar nas programacións e implementar os últimos laboratorios de aprendizaxe no camiño que os define: Aprendizaxe Baseada en Proxectos, Alfabetización en Información e Tarefas Integradas para desenvolver as Competencias Clave de maneira significativa a través da experiencia.
Un trimestre que promete ser moi constructivo, no tocante a: Día do Libro-Letras Galegas (Mes das Letras) e ODS da Axenda 2030, que presiden as nosas actividades ao longo do curso.

A por un trimestre creando experiencias, 
a por un trimestre construíndo!



30/03/21

ESCAPE ROOM ( 4ºEI)

 Hoxe, para rematar o trimestre realizamos un xogo de escapismo, no que a Serea Leo nos daba media hora para atopar uns agasallos agochados na aula de apoio infantil. Primeiro visualizaron o vídeo explicativo e despois buscamos as pistas , abrimos candados de números e de chaves, descubrimos os números cun código Qr na plantilla do Robot Doc, o número 4 pintado con luz ultravioleta, o 2 nunha caixiña e o 1 montando as pezas dun puzle. 

Foi moi divertido e ademais os tres pequenos grupos atoparon o agasallo da Serea Leo: sementes de flores!!!!!



Como o fixeron moi ben, levaron de premio un óvo e un coelliño de fieltro!!!


 ESCAPISMO - Kizoa Movie Maker








26/03/21

Lab. de Ideas: cociñando con-Ciencia!

Chegamos ao final do 2º trimestre deste singular curso 2020/21 presentando as tarefas desenvoltas, ao longo do mes de marzo, no Laboratorio de Ideas: cociñando con-Ciencia!

Un laboratorio con ingredientes moi saborosos e valiosos como: igualdade de xénero, experimentación, estereotipos, visitas, receitas de vida... A integración de todos eles cociñouse con corazón para dar coma resultado receitas vivenciais moi significativas para TODOS/AS: desenvolvemento das competencias.

Na seguinte listaxe poderedes acceder ás entradas de cada grupo-aula promocionadas  na bitácora dos Laboratorios de Aprendizaxe:

Parabéns a TOD@S polas vosas producións, a vosa emoción aprendendo, día a día, para ser cidadáns competentes con pensamento creativo e crítico!

Feliz descanso, voltamos no 3º trimestre con novas propostas de actividades creativas.

3º_Lab. de Ideas: cociñando con-Ciencia

 
Presentamos o vídeo-resumo da primeira parte, experimentamos, do Laboratorio de Ideas que estamos a desenvolver ao longo deste mes de marzo arredor da cociña como laboratorio caseiro de aprendizaxe e a Muller.

Integramos o Lab. de Ideas na nosa programación tratando contidos matemáticos, lingüísticos e reforzando/ampliando contidos dos lapbooks de Ciencias:

  • O noso corpo aliméntase (Corpo e Alimentación de C.C. da Natureza)
  • Historia da paisaxe (Paisaxe e Historia de C.C. Sociais)
A segunda parte do Lab. de Ideas está en proceso de desenvolvemento, agradecer a colaboración das nosas familias unha vez máis.

Seguimos!

Presentamos o noso caderno de "Receitas queridas" e o vídeo-resumo da segunda parte do Laboratorio de Ideas: cociñando con-Ciencia.

Un laboratorio moi productivo, no tocante a: experimentación, investigación, concienciación arredor da igualdade de xénero e a cociña como laboratorio caseiro de aprendizaxe.

Parabéns a todo@s por un trimestre máis, superheroico!

Para pór punto e final ao Lab. de Ideas desfrutamos da xenerosa visita de Dna. Carmen Trigo, profesora de cociña tradicional e madriña do Laboratorio de Cociña.

Picando na imaxe accederedes ao álbum de fotos da visita. 

Non puidemos ter un peche máis fermoso e saboroso do Laboratorio de Ideas e deste 2º trimestre, pois elaborou a receita "Galletas de nata" que recollemos na nosa plantilla "Receitas queridas" e agasallounos cunha bolsiña de galletas para cada un de nós; así como nos deixou escritas da súa man dúas receitas e imaxes do gran repertorio culinario que atesoura.

Picando na seguinte imaxe accederedes ao álbum de fotos das súas extraordinarias creacións.

 

Agradecer a Dna. Carmen, Carmiña como a coñecen en Malpica, a súa relevante visita por canto representa para o noso colexio e pola súa gran amabilidade con tod@s. Esperamos que volte en máis ocasións para contarnos as historias que se cociñan en cada unha das súas receitas con corazón.




2º_Laboratorio de Ideas: cociñando con-Ciencia

Este curso, no Día Internacional da Muller, quixemos festexalo realizando unha entrevista a unha antiga alumna do noso colexio: a Yara Castro Ortega, de profesión cociñeira e rexente do Restaurante Casa da Vasca. 

Preparamos entre todos/as as preguntas e convidamos a Yara a vir a Radio Balea, onde Noela, Siro e Lola lle fixeron a entrevista. 


Voltamos recibir a visita da cociñeira Yara Castro, de Casa da Vasca. Veunos impartir un obradoiro de cociña para ensinarnos como se fan as receitas da Tosta de sardiña afumada e a sobremesa Nocilla 3.0. 

Traballamos por equipos para escribir a receita da crema de queixo, da marmelada de tomate e da copa de chocolate. Traballamos con diferentes medidas de capacidade e peso, manipulamos diferentes alimentos de orixe vexetal e animal, fixemos mesturas....En definitiva, aplicamos a ciencia á cociña e despois degustamos todo o que fixemos coas nosas propias mans. 

Unha mañá intensa, chea de emocións. Grazas Yara por compartir con nós os teus saberes e  ensinarnos sobre a túa profesión!

25/03/21

1º de EP - Cociñando con-Ciencia (I): Quen cociña na miña casa?

Boas a todos e a todas!

Aquí vos deixo unhas imaxes do resultado da enquisa que se vos realizou na casa. Quen cociña na nosa casa? A esa persoa (ou persoas) gústalle esa tarefa?

No mural podemos ver cantas nais (13) e cantos pais (7) cociñan. Ademais diso, a cantos lles gusta (pulgar azul) e a cantos non lles gusta (pulgar vermello).

Esta actividade forma parte da proposta Cociñando con-Ciencia, que relaciona a cociña, a ciencia e a figura da muller.